ᐱᔨᑦᓯᕋᐅᑎᖏᑦ
ᑐᓴᐅᒪᔪᓕᕆᓂᕐᒧᑦ ᐅᐸᓗᖓᐃᔭᐅᑏᑦ
ᑕᑯᒃᓴᑎᒎᖓᕋᓗᐊᕈᓂ, ᐃᓄᓕᒫᓅᖓᕋᓗᐊᕈᓂ, ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒨᖓᕈᓂ ᐅᕝᕙᓘᓐᓃᑦ ᓄᓇᓕᒻᒥ ᐃᓚᐅᑎᑦᓯᓂᕐᒨᖓᕈᓂ, ᐃᓚᓕᐅᑎᓯᒪᔪᖅ ᑐᓴᐅᒪᔪᓕᕆᓂᕐᒧᑦ ᐅᐸᓗᖓᐃᔭᐅᑎᕗᑦ ᖃᐅᔨᒪᑦᓯᐊᕆᐊᕈᑕᐅᔪᑦ ᑐᓴᖅᑕᐅᓪᓗᐊᑕᕆᐊᓖᑦ ᐊᒻᒪᓗ ᐊᔾᔨᒌᙱᑦᑐᒃᑯᑦ ᑐᓴᖅᑎᑦᓯᒐᓱᐊᕐᓃᑦ ᐃᖏᕐᕋᖃᑎᒌᑦᓯᐊᕋᓗᐊᕐᒪᖔᑦᑕ. ᑐᙵᕕᒋᓲᕗᑦ ᐊᑐᓂ ᐅᐸᓗᖓᐃᔭᐅᑎ ᖃᐅᔨᓴᑦᓯᐊᕐᓂᒃᑯᑦ ᐃᓱᒪᒋᔭᐅᔪᓂᑦ ᐊᒻᒪᓗ ᐊᑦᓱᕈᕈᑕᐅᔪᓂᒃ, ᐊᒻᒪᓗ ᐋᖅᑭᒋᐊᓲᕗᑦ ᐱᔨᑦᓯᕋᖅᑕᐅᔫᑉᐱᒋᐊᖃᖅᑕᖏᓐᓄᑦ ᐊᒻᒪᓗ ᑮᓇᐅᔭᕐᓄᑦ ᐊᑐᖅᑐᑦᓴᖏᓐᓄᑦ. ᓴᖅᑭᑉᐳᖅ ᑕᐃᑲᙵᑦ ᐸᕐᓇᐅᑎ ᑐᕌᖅᑐᒥ ᑭᒃᑯᓐᓅᖓᑎᑕᐅᒻᒪᖔᖅ ᓈᒻᒪᓈᖅᑐᒃᑯᑦ ᐃᑉᐱᒍᓱᑦᓯᐊᓯᓐᓈᑦ ᐃᓕᖅᑯᓯᕐᒧᑦ ᐃᓗᓕᖃᕆᐊᖃᕐᓂᖓᓂ.
ᓴᓇᒪᓂᖓ ᐊᒻᒪᓗ ᑎᑎᖅᑲᑦ
ᖃᐅᔨᒪᑦᓯᐊᖅᑕᕗᑦ ᐱᒻᒪᕆᐅᓂᖓᓂ ᐋᖅᑭᐅᒪᑎᑦᓯᓂᕐᒥᑦ ᐅᑭᐅᖅᑕᖅᑐᒧᑦ ᐊᒻᒪᓗ ᓴᖅᑮᓲᖑᔪᒍᑦ ᓱᓇᒃᑯᑖᑎᓐᓂᑦ ᐱᔨᑦᓯᕋᕐᓂᕐᒧᑦ ᑖᒃᑯᓂᖓ ᐱᔭᐅᔭᕆᐊᓕᓐᓂᒃ. ᓴᓇᒪᔪᓕᕆᔨᕗᑦ ᐱᓕᒻᒪᑦᓴᖅᓯᒪᑦᓯᐊᖅᑐᑦ ᐊᒻᒪᓗ ᐱᓕᕆᓂᑰᑦᓯᐊᖅᓱᑎ ᓄᓇᕗᒻᒥ, ᑐᑭᓯᐅᒪᓂᖃᖅᓱᑎᓗ ᐅᖃᐅᓯᕐᒧᑦ ᒪᓕᒋᐊᓕᓐᓂᒃ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐊᕙᑎᖓᓂ. ᐊᓪᓚᕝᕕᕗᑦ ᒫᒃ (Mac)−ᓂᒃ ᐊᑐᖃᑦᑕᖅᑐᑦ ᐊᒻᒪᓗ ᐅᓪᓗᒥᓯᐅᑎᓂᑦ ᑎᑭᐅᒪᑦᓯᐊᖅᑐᒍᑦ ᒫᓐᓇᐅᔪᖅ ᓴᓇᔪᓕᕆᕝᕕᓐᓂ ᐊᑐᖅᑕᐅᔭᕆᐊᓕᓐᓂᒃ ᐊᒻᒪᓗ ᖃᕋᓴᐅᔭᓕᕆᔾᔪᑎᓂ. ᐊᑐᓕᖃᓯᐅᑎᓯᒪᔭᕗᑦ ᔫᓂᑰᑦ (Unicode) ᖃᓂᐅᔮᖅᐸᐃᑎᑐᑦ ᑎᑎᕋᐅᓯᕐᓂᒃ ᐱᓕᕆᐊᕆᖃᑦᑕᖅᑕᑦᑎᓐᓄᑦ ᑕᐃᒪᙵᓂ ᓴᖅᑭᑎᑕᐅᔪᒻᒪᑕ.
ᓇᓗᓇᐃᒃᑯᑕᓕᐅᕐᓂᕐᒥᑦ ᐊᒻᒪᓗ ᓂᐅᕕᐊᑦᓴᖃᕋᓱᐊᕐᓂᕐᒥᑦ ᐱᔨᑦᓯᕋᐅᑎᖏᑦ
ᐅᖃᐅᓯᑦᑎᐊᕙᓐᓂ ᐋᖅᑭᑦᓱᐃᓲᖑᔪᒍᑦ ᑲᔪᓯᓂᖃᑦᓯᐊᖅᓯᒪᔪᓂᑦ ᓂᐅᕕᐊᑦᓴᖃᕋᓱᐊᕐᓂᕐᒥᑦ ᐊᒻᒪᓗ ᓇᓗᓇᐃᒃᑯᑕᓕᐅᕐᓂᕐᒥᑦ ᐅᐸᓗᖓᐃᔭᐃᓂᕐᒥᑦ, ᓴᓇᒪᔪᓕᕆᔨᕗᑦ ᐊᒻᒪᓗ ᐃᖅᑲᓇᐃᔭᖅᑎᕗᑦ ᑐᑭᓯᐅᒪᒻᒥᔪᑦ ᖃᓄᖅ ᑐᕌᖓᑎᑕᐅᔪᓐᓇᕐᒪᖔᑦ ᐊᒻᒪᓗ ᐃᓕᖅᑯᓯᕐᒨᖓᑦᓯᐊᕐᓗᑎ ᓄᓇᕗᒻᒧ. ᐃᓱᒪᑦᓴᖅᓯᐅᕈᑏᑦ ᓇᒥᑐᐃᓐᓇᖅ ᐊᔪᙱᑦᑐᑦ ᑕᐃᒪᐃᔾᔪᑕᐅᒐᔪᙱᑦᑐᐃᓪᓕ ᐅᑭᐅᖅᑕᖅᑐᒥ, ᐃᓱᒪᑦᓴᖅᓯᐅᕈᑏᑦ ᐃᓚᖏᑦ ᑕᒫᓂ ᐊᔪᙱᑦᑐᑦ ᐊᒻᒪ ᐊᓯᐊᓂᖔᖅ ᐊᔪᖅᓱᑎ. ᑕᒪᒃᑭᑲᓴᑦ ᓂᐅᕕᐊᑦᓴᖃᕋᓱᐊᕐᓂᕐᒥᑦ ᐊᒻᒪᓗ ᓇᓗᓇᐃᒃᑯᑕᓕᐅᕐᓂᕐᒥᑦ ᐱᓕᕆᐊᖑᔪᑦ ᐃᓚᖃᓕᖅᑐᑦ ᐃᓅᖃᑎᒌᓐᓂᕐᒧᑦ ᓯᐊᒻᒪᖅᑎᑦᓯᓂᒃᑯᑦ, ᐃᓗᓕᖏᑦ ᐱᕕᖃᖅᑎᑦᓯᓲᑦ ᐱᕙᓪᓕᐊᓂᖏᑦ ᖃᐅᔨᓴᖅᑕᐅᒍᓐᓇᕐᓗᑎ ᐋᖅᑭᒋᐊᖅᓯᒍᓐᓇᕐᓗᑎ ᐅᖓᓯᑦᑐᒨᖁᓪᓗᒋᑦ ᐊᒻᒪᓗ ᐊᑦᑐᐃᓂᖃᖁᓪᓗᒋᑦ.
ᑕᕐᕆᔮᑦᓴᖅ ᐊᒻᒪᓗ ᐊᔾᔨᓕᐅᕆᓂᖅ
ᐊᑐᐃᓐᓇᐅᑎᑦᓯᓲᖑᔪᒍᑦ ᐃᓗᐃᑦᑐᒥᑦ ᐱᔨᑦᓯᕋᐅᑎᓂᑦ ᑕᓚᕖᓴᒃᑯᑦ, ᑕᕐᕆᔭᓕᐅᕐᕕᒃᑯᑦ, ᐊᖓᔪᖅᑳᖃᕐᕕᓐᓄᑦ, ᐃᑭᐊᖅᑭᕕᒃᑯᑦ, ᓴᓇᙳᐊᕐᓂᒃᑯᑦ ᐊᒻᒪᓗ ᑕᑯᑦᓴᐅᑎᑦᓯᓂᒃᑯᑦ ᑕᕐᕆᔮᑦᓴᓂᑦ ᐱᔨᑦᓯᕋᐅᑎᓂᑦ, ᐃᓚᒋᓪᓗᓂᐅᒃ ᖁᓕᒥᒎᓕᐅᔮᖅᑐᒃᑯᑦ ᐊᔾᔨᓕᐅᕆᓂᕐᒥᑦ. ᐱᓕᕆᖃᑎᒌᖁᑎᑉᐳᑦ ᓴᖅᑮᓲᑦ ᐊᒻᒪᓗ ᐱᓕᕆᐊᖃᓲᑦ ᑕᕐᕆᔮᑦᓴᓂᑦ ᐊᕐᕌᒍᓕᒫᖅ ᓄᓇᕗᒻᒥ ᐊᒻᒪᓗ ᐊᑐᐃᓐᓇᐅᖏᓐᓇᓲᑦ ᑲᑎᖃᑎᖃᕐᓂᕐᒥᑦ ᐱᔨᑦᓯᕋᕈᑕᐅᔪᓄᑦ, ᐃᓱᒪᒋᔭᐅᔪᓂᑦ ᐅᖃᐅᓯᖃᕐᓂᕐᒥᑦ ᐊᒻᒪᓗ ᓴᖅᑮᓂᕐᒥᑦ ᓄᑖᓂᑦ ᐃᓱᒪᒋᔭᐅᔪᓂᑦ. ᐅᓪᓗᒥᓯᐅᑎᓪᓚᕆᓐᓂᒃ ᐊᔾᔨᓕᐅᕆᓂᕐᒧᑦ ᓱᓇᒃᑯᑖᓂᑦ ᐊᑐᖅᓱᑎ, ᐊᔾᔨᓕᐅᕆᓲᖑᔪᒍᑦ ᐱᖁᑎᓂ, ᐊᖓᔪᖅᑳᖃᕐᕖᑦ ᐊᔾᔨᙳᐊᖏᓐᓂ, ᐃᓪᓗᕐᔪᐊᓂ, ᐊᕐᕌᒍᑕᒫᖅᓯᐅᑎᓂ ᐅᓂᒃᑳᓕᐊᓂ, ᖃᓄᐃᓐᓂᐅᔪᓂᑦ, ᓂᕿᓂ, ᐱᙳᐊᕐᓂᖅ ᐊᒻᒪᓗ ᖃᓄᐃᓕᐅᕐᓂᖅ, ᐆᒪᔪᓂᑦ ᐊᒻᒪᓗ ᓄᓇᓂ, ᑖᒃᑯᐊ ᐃᓚᐃᓐᓇᑐᐊᕆᓪᓗᓂᒋᑦ.
ᐸᐃᑉᐹᑎᒍᑦ ᐊᒻᒪᓗ ᓴᖅᑭᑎᑦᓯᓂᕐᒧᑦ ᐱᔨᑦᓯᕋᐅᑎᖏᑦ
ᐋᖅᑭᑦᓱᖅᓯᒪᑦᓯᐊᖅᑐᒃᑯᑦ ᐱᓕᕆᖃᑎᒌᓐᓂᕗᑦ ᓴᖅᑭᑎᑦᓯᔪᓕᕆᔨᒃᑯᓐᓂ, ᐊᐅᓪᓚᖅᑎᑦᓯᓂᕐᒧᑦ ᑲᑐᔾᔨᖃᑎᒋᖃᑦᑕᖅᑕᕗᑦ ᐊᒻᒪᓗ ᑳᓐᑐᕌᒃᑎᒃᑲᓐᓂᐅᓲᑦ ᐅᕙᑦᑎᓐᓂ ᐃᑲᔪᓲᑦ ᑲᔪᓯᑎᑦᓯᓂᕐᒥᑦ ᐊᑑᑎᖃᖅᑐᒥᑦ ᐊᒻᒪᓗ ᐊᑭᑐᓗᐊᙱᑦᑐᒥᑦ ᐃᖅᑲᓇᐃᔭᕐᓂᕐᒧᑦ ᐃᖏᕐᕋᓂᕐᒧᑦ, ᓴᖅᑮᓲᖑᓪᓗᓂ ᐱᐅᔪᒻᒪᕆᓐᓂ ᓱᓇᒃᑯᑖᓂᑦ ᓴᖅᑭᑕᐅᓪᓗᑎ ᓱᒃᑲᓕᔪᒥ ᐊᒻᒪᓗ ᑐᓂᔭᐅᓪᓗᑎ ᐱᔨᑦᓯᕋᖅᑕᑦᑎᓐᓄᑦ ᓇᒥᑐᐃᓐᓇᖅ ᓄᓇᕗᒻᒥ. ᐅᖃᐅᓯᕗᑦ ᐊᔾᔨᒌᑦᑐᑦ ᐊᒻᒪᓗ ᑕᒻᒪᖅᓯᒪᙱᑦᑐᑦ, ᐊᑐᐃᓐᓇᐅᑎᑦᓯᓲᖑᔪᒍᑦ ᑮᓇᐅᔭᕐᓂᒃ ᐊᑐᖅᑐᑦᓴᓂᑦ ᐊᒻᒪᓗ ᐊᑭᖏᓐᓂᒃ ᖃᐅᔨᓴᕐᓂᕐᒥᑦ ᑕᐃᒪᐃᒋᐊᖃᖅᑎᓪᓗᒍ.
ᐃᑭᐊᖅᑭᕕᒻᒥ ᐋᖅᑭᑦᓱᐃᓂᕐᒥᑦ
ᑲᑎᑦᑐᑦ ᐱᓕᕆᕝᕕᕋᓛᖑᔪᑦ ᑕᐃᑲᓂ ᐊᑏ-ᒎ ᑕᑯᒃᓴᑎᒍᑦ ᓯᐊᒻᒪᖅᑎᑦᓯᓂᕐᒧᑦ ᐱᓕᕆᔨᒻᒪᕆᐅᔪᑦ ᐃᑭᐊᖅᑭᕕᒻᒥ ᐋᖅᑭᑦᓱᐃᓂᕐᒥᑦ ᐱᓕᕆᐊᑦᓴᓄᑦ. ᐊᔾᔨᒌᙱᑦᑐᓂᑦ ᓇᓖᕌᕈᑎᑦᓴᓂᑦ ᐊᑐᐃᓐᓇᐅᑎᑦᓯᓲᖑᔪᒍᑦ ᐊᑲᐅᓈᖁᓪᓗᒋᑦ ᐊᔾᔨᒌᙱᑦᑐᑦ ᐱᔭᐅᔭᕆᐊᓖᑦ, ᒥᑭᔫᑎᓂᑦ ᐃᑭᐊᖅᑭᕕᓐᓂ ᐊᖏᓂᖅᓴᓄᑦ ᐅᐸᕝᕕᐅᕙᑦᑐᓄᑦ ᑐᖅᑯᖅᑕᐅᓯᒪᔪᒃᑯᕕᓐᓂ ᐱᔭᕆᐊᑐᔪᓂᑦ ᐃᓗᓕᖏᓐᓄᑦ ᐊᐅᓚᑦᓯᓂᕐᒧᑦ ᐱᓕᕆᔾᔪᑎᓄᑦ. ᓱᖏᐅᑎᓯᒪᔪᒍᑦ ᐊᑦᓱᕈᕈᑕᐅᔪᓂᑦ ᐊᖏᔪᒥᑦ ᖃᕋᓴᐅᔭᒃᑯᑦ ᐃᑭᐊᖅᑭᔾᔪᑎᐅᔪᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐃᑭᐊᖅᑭᕕᕗᑦ ᓴᓇᖃᑦᑕᖅᑕᕗᑦ ᐊᑑᑎᖃᖁᓪᓗᒋᑦ ᐊᒻᒪᓗ ᐱᐅᔫᑕᐅᖁᓪᓗᒋᑦ. ᐃᑭᐊᖅᑭᕕᓕᐅᓲᖑᔪᒍᑦ ᑕᒪᐃᓐᓂᒃ ᓄᓇᕗᒻᒥ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᒃᑯᑦ.
